نص مسرحي (Oxygen) مهداة الى كل ضحايا الحرائق في العراق تأليف : الدكتور حيدر علي الاسدي ( البصرة) المشهد الاول (داخل صالة انتظار المصابي...
نص مسرحي
(Oxygen)
مهداة الى كل ضحايا الحرائق في العراق
تأليف : الدكتور حيدر علي الاسدي ( البصرة)
المشهد الاول
(داخل صالة انتظار المصابين....يظهر بعض الشباب المرافقين لمرضاهم المصابين)
شاب 1 : (يغني) همزين بيد الله الهوه ومو بيدك ...يالعذبتني وترى روحي تريدك .....(يكرر بصوت شجي)
شاب 2 :يمعود كافي مو جوه مرضى وتعبانين
شاب 1 : خليني اطلع الضيم البگلبي ....
شاب 3: خيرك بعد اخوك چنك شايل هموم الدنيا على راسك ...
شاب 1 : لا هيج ماكو شيء ،قابل ابوي جوه بين الحيه والموت .....لو قابل اخوي شهيد وصارلي سنتين افتر على راتبه وما دابره ....لو هاي رجلي المصخمة الما جاي تعيني صار ستشهر حتى فلوس طبيب ماعندي اشوفها شبيها ما بيها .
شاب 4 : كلنا بالهوة سوة .....
شاب 2 : اكلك صدگ انت مو طفرت شرجعك..
شاب 4 : الوطن
(يضحكون جميعا بسخرية لاذعة)
(بعد لحظات هدوء )
شاب 4 : أي والله شبيكم ...ماكو مثل الوطن ..صح مر ...مر كلش وما ينجرع بس ماكو احله من ضيمه ...الوطن مثل الجحيم الي ندخله برضاتنا ...الوطن مثل الابن العاق الي ما نكدر نعوفه حتى لو غلط ...الوطن مثل نارين وموتين وضيمين فوك راسك وراس الخلفوك وين ما تروح تشوفه گبالك....
شاب 1: اشتغلت الفلسفة واحنا الضيم ياحالنا...
شاب2 : اكلكم انا جوعان محد عنده اكل..
شاب4 (ساخرا) لا تستعجل هسة يجيبون لنا المستشفى كنتاكي وفستق وبندق ولوز وجوز وبرياني وسمج مسكوف وصينية كنافة ...صيام بعد لازم نتشرط!
شاب 2: خلي يجيبون اوكسجين وادوية لاهلنا وبس ...ما نريد لا اكل ولاكنافة ولا هم يحزنون .
(صرخة مدوية ....يبوووووو....يبوووو)
شاب4 : ياساتر
شاب 1: ماكو شيء شباب ماكو شيء بس ابو علاء انطاكم عمره...
(الشباب جميعا : انا لله وانا اليه راجعون)
شاب 4: جنه يعلم ...كال ما اطول....
شاب 1 : بس تره عمره مو جبير...
شاب 4: أي بس هو من زمان عنده امراض مزمنة ...
شاب 1: اكلك صدك هو ماعنده اولاد ولا بنات
شاب 4: كلهم مسافرين
شاب 1: لعد منو يدفنه
شاب 4: ربك موجود....
((ينشغلون بترتيب فراشهم وكانهم ينامون بالممرات))
((المشهد الثاني ))
شاب 1 : اگلك ابوك صارله شكد جوه
شاب3 : اسبوع ....عايش على الأوكسجين .....الطبيب كال حالته خطرة ونسبة نجاته ضعيفة جداً
شاب 1: وانا هم اخوي الچببر صارلة 4 ايام على الاوكسجين ...بس ( يصمت)
شاب 3 : بس شنهو
شاب 1: بصراحة احتاج ادوية وابر من بره المستشفى بس ماعندي اشتريله ...
شاب 3: كلحنا هيج....اعتمدنا على نفسنا ولو انا اعرف اتحكم بالاوكسجين فلا اجيب مريضي هنا ...
شاب 2: حتى الهوة صار بفلوس...كلشي بفلوس حتى حياتنا لازم نشتريها بفلوس
شاب 1: استغفر ربك....
شاب 2 : شباب اشم ريحة حرك
شاب 1: (مازحا) هاي گلوبنا وجرت ..
شاب 2: لا والله اشم ريحة عطاب...
(مباشرة يتعالى الدخان ولهيب النار مع اصوات الصرخات)
(صراخ مختلط من هنا وهناك )
- حريق حريق حريق
احتركنا احتركنا
الناس احتركت لحگو ياناس ياعالم
العالم ماعت العالم ذابت
العالم صارت لحم
(اصوات صفارات الإنذار تختلط مع الصرخات)
(المشهد الثالث )
((جثث ونار وحريق واشلاء مترامية من هنا وهناء بردهة المصابين بكورنا في المستشفى)
(أحدهم عليه قناع الاوكسجين يرفعه ويتكلم ...)
-مصاب 1: والله حيرة ابقى مخلي الاوكسجين أموت من النار...أنزع الاوكسجين اختنك وأموت...
عفية بلد مايوم بالأيام صار عدنا خيار ثالث...
كله ...لو نموت لو نموت...
مصاب 2: جبناها من وجع لوجع بالحرب لو تتقدم وتموت بالمعركة لو ترجع ويعدمونك فرق الاعدام.....( يمثل دور الجندي يتقدم ويتأخر) ومن ثم يكمل:
-وهسة لو تبقى بالسرير وتموت محروك لو تنزع الاوكسجين وتموت من الخنكة ....
مصاب 1 : يلة على الاقل راح نموت يم اهلنا...
مصاب 2 : بس انا أريد اعيش عرس اختي الأسبوع الجاي وانا وعدتها اشتريلها بدلة العرس....لو ما هذا الوباء اللعين طيحني...
مصاب 1 : راح نموت فاضل
مصاب 2: هسة يجونا لا تفاول علينا انا متاكد هسه يطلعونا ونعيش
مصاب 1: ولك شيطلعونه ( يكح بصوت عال) صارلنا ساعتين استوينا على نار هاديه ومحد دخلنا...
مصاب 2: ياخي لازم اكو حل ...ما معقول نموت هيج..جا احنا شردنا من موت كورونا يجينا موت الحرگ...مو حتى گلوبنا خلصانة ..
مصاب 1: ولك احنا العراقيين احترگنا بالدنيا قبل الاخرة
مصاب 2: صوجهم والله صوجهم ( يفرك بيديه ومن ثم يعض اصابعه)
مصاب 1: هسة وكتها..
مصاب 2: انا اكول راح يتلاحكونا ما معقولة نموت هنا...
((صوت غناء من خلف المسرح ...همزين بيد الله الهوة ومو بيدك....يكرر)
((اصوات صفارات انذار))
مصاب 1 صوجهم والله ...
مصاب 2 چا انت راح تموت وبعد خايف تكول أسمائهم....
مصاب 1: الحرارة جاي تلسع جسمي ووجهي
احس شعري صار شعواط وقلبي دكاته سرعت ...
مصاب 2 وانا احس الهوة ماكو يمي ...احسه طار...احسه مات ...وطلع من المستشفى مثل ما طلعت الدنيا من عيوني من سنين وسنين ...
مصاب 1: (خوية اوصيك خاف اموت ....وصيتي مخليها عند حجي فاضل)
مصاب 1 ( حجي ....حجي ....حجي على بختك رد ....يزحف له ويتاكد من موته وتسقط لهيب نار حولهما وتلفهما معا)
((اغنية همزين بيد الله الهوة ومو بيدك تنازليا تصمت))
((يدخل للساحة فجاة مكتوب عليه اسماء الموتى المصابين الإثنين المحترقين وقطعة لافتة سوداء مكتوب بيها تعزية للشهداء من المحترقين ...مع تعالي صوت مقدمي الأخبار من الارشيف الذين اذاعوا خبر الحريق))
((ويختم بطفل يرفع لافتة مكتوب عليها))
((عندما يقود البلد طغمة فاسدة...يتحول الوطن لمحرقة كبيرة للفقراء))
النهاية
ملحوظة : النص كتب قبل حريق مستشفى الناصرية وقبل حادثة مول الكوت.
